Öndverðarnesið fullorðnast

Öndverðarnesvöllur í Þrastarskógi í Grímsnesi var stækkaður í 18 holur í júlí í sumar og er óhætt að segja að þar hafi metnaðarfull markmið orðið að veruleika en nágranni Múraravallarins eins og hann er oft kallaður, Kiðjaberg, varð að 18 holu velli fyrir nokkrum árum síðan.
Öndverðarnesið var lengi bara þokkalegur sveitavöllur, ekkert meira en það. Á síðustu árum hefur orðið veruleg breyting þar á eftir að klúbburinn fékk Golfklúbb Reykjavíkur í samstarf við vallarvinnuna og það var án efa skynsamlegt skref hjá litla sumarbústaðaklúbbnum sem nú er kominn í hóp stóru klúbbana sem eru með 18 holu velli. Þetta er fjórtándi 18 holu völlur landsins.

Eigendur Öndverðarness réðu Margeir Vilhjálmsson, þáverandi framkvæmdastjóra GR seinni part sumars 2005 til að hanna níu holur til viðbótar og hófust framkvæmdir árið 2006. Nú aðeins tveimur árum síðar hefur nýi hlutinn verið opnaður og það verður að teljast ótrúlegt því þó vissulega eigi nýju holurnar eftir að gróa betur þá var engin ástæða til að bíða lengur með opnunina sem var 18. júlí sl. Grasið á flötum er í fínu lagi og einnig á brautunum, þó það sé ekki eins þétt þar. Stækkunin er að helmingi í mýrlendi og helmingi í kjarri vöxnu hraunlendi. Brautir vallarins eru breiðar og lengdin í jafnvægi við gömlu níu holurnar.

Margeir segir að völlurinn sé hugsaður fyrir kylfinga af öllum getustigum, hann er því ekki langur, en til að skora völlinn vel er nauðsynlegt að staðsetja teighöggin rétt. Þannig er það á flestum nýju brautunum, t.d. á 2., 5. og 7 en ekki eins mikið mál á fyrstu braut sem er 306 metra par 4, þægileg byrjunarhola. Önnur er par 5, 475 metrar og þarf að slá yfir skurð og í drævlengd eru þrjár glompur sem bíða eftir að gleypa kúlurnar. Hitti menn brautina er góður möguleiki á fugli. Utan brautar á flestum holum er röffið ekki skemmtilegt viðureignar en þó ekki alveg jafn erfitt og á Haukadalsvelli.

Fimmta holan í Öndverðarnesi er mjög skemmtileg, par 4 og maður verður að staðsetja upphafshöggið. Fæstir slá með dræver þar. 3. og 6. eru par 3, sú fyrri um 150 metrar og mun erfiðari parhola en sú sjötta sem er stutt en sæt. Sjöunda er par 5 og það eru ekki margir sem hitta þar inn á í tveimur höggum og flötin er með mjög miklu landslagi. Það mætti halda að Margeir hafi verið nýkominn af 8. flöt á Geysi en þó ekki alveg. Alla vega þarf að huga að innáhögginu áður en slegið er því staðsetning á flötinni getur verið krúsíal til að klára parið, hvað þá fuglinn. Fimmta , sjötta og sjöunda eru í miklu hraunlendi og mjög fallegu landslagi. Þar eru ágætir möguleikar á fugli eftir góð upphafshögg.
Áttunda er par 4 og er eins og tvíburasystir 3. brautarinnar þó hún sé aðeins styttri, svo svipaðar eru þær. Ágætar holur samt með glompum og báðar slegnar í hundslöpp. Níunda er þriðja par 3 brautin á fyrri níu, stutt 120 metra hola sem á eftir að klára hvað hindranir varðar svo það er óþarfi að eyða mörgum orðum um hana. Flötin sést öll frá svölum golfskálans og það er skemmtilegt því þar eru kylfingar oft úti og spjalla saman í góðu veðri og fylgjast með öðrum koma inn.

Nýju flatirnar eru stórar og mikið lagt upp úr góðri staðsetningu á glompum og það hefur tekist. Bæði sjást glompurnar vel og eru ágætasta hindrun fyrir flesta. Margeir segir að mikil mótun hafi farið fram í mýrlendinu og nutu menn þar mikillar jarðvegsmótunarkunnáttu og golfáhuga ýtustjórans Steindórs Eiðssonar, en honum hefur oft verið lýst sem töframanni þegar kemur að mótun golfvalla. Hann hefur m.a. unnið við Korpúlfsstaðavöll, Hvaleyrarvöll, Hellishóla, Vífilsstaðavöll og fleiri golfvelli.

Aðaldriffjaðrirnar í uppbyggingunni hafa verið Ólafur Jónsson, formaður vallarnefndar, Guðmundur Hallsteinsson, formaður og Örn Karlsson, framkvæmdastjóri. Fjölmargir félagsmenn hafa einnig lagt hönd á plóginn bæði með fjárframlögum og sjálfboðavinnu.


Það er líklegt að félagar og gestir hafi fagnað þessari viðbót í Öndverðarnesi sem hefur heppnast mjög vel. Hér er viðbót vallarins hugsuð í stíl við gamla partinn og með hliðsjón af félögum og gestum sem sækja hann. Þar hafa bæði Haukadalsvöllur og Kiðjaberg farið aðrar leiðir, báðir glæsilegir vellir en mun erfiðari golfvellir.

Það verður engin svikinn af því að sækja Öndverðarnesið heim því ekki einungis eru komnar níu nýjar flottar golfholur heldur eru fyrir gamlar og góðar níu holur sem eru orðnar „þroskaðri“ og betri með markvissari umhirðu undanfarin ár.
Golfklúbbur Öndverðarness var stofnaður árið 1974 og byggði fyrsta golfvöllinn í sumarhúsabyggð á Íslandi. Golfskáli með veitingasölu er við völlinn og er hinn ágætasti.

Það verða því tímamót á næsta ári þegar klúbburinn fagnar 35 ára afmæli.

Páll Ketilsson.


Myndir/Kylfingur.is: Hér má sjá myndir frá golfvellinum í Öndverðarnesi.