Kálfatjarnarvöllur kemur á óvart

Kálfatjarnarvöllur, golfvöllur Golfklúbbs Vatnsleysustrandar, er völlur sem vert að gefa gaum. Hann er staðsettur mitt á milli Hafnarfjarðar og Reykjanesbæjar, liggur umhverfis Kálfatjarnarkirkju, aðeins 15 mínútna akstur frá Hafnarfirði. Völlurinn er 9 holur, par-70 og hefur verið breytt mikið síðustu tvö árin. Það sem kom undirrituðum mest á óvart, er hann spilaði völlinn á dögunum, var hve vel hann er hirtur. Brautirnar góðar og flatirnar með allra besta móti, mun betri en t.d. í Grafarholti eða Leirunni. Þá eru lengdarmælingar á áberandi stöðum þannig að auðvelt er að átta sig á fjarlægðum að flötum.

Húbert Ágústsson er framkvæmdastjóri og vallarstjóri og greinilegt að þar fer maður með reynslu í vallarstjórnun. Hann segir völlinn í fínu standi og það eina sem skorti á er að fá fleiri til að spila hann. „Ég held að kylfingar á höfuðborgarsvæðinu hafi ekki hugmynd hversu góður völlurinn er orðinn. Það er búið að lengjan hann mikið, breyta honum og hann er orðinn erfiðari en áður. Það tekur innan við hálftíma að aka hingað frá Reykjavík og ég held að fólk ætti að skoða þennan völl sem við höfum upp á að bjóða,“ sagði Húbert.

Þó svo að völlurinn líti út fyrir að vera auðveldur við fyrstu sýn þá refsar hann töluvert ef kylfingar eru ekki á braut. Ýmsar torfærur eru utan brauta, svo sem gamlar grjóthleðslur, hraun, tjarnir og fleira. Það er því erfitt að skora vel á honum, alltént var það niðurstaðan hjá undirrituðum. Kálfatjarnarvöllur er steinsnar frá höfuðborginni og því upplagt fyrir borgarbúa að prófa völlinn á björtum sumarkvöldum. Þá er á svæðinu heimilislegur golfskáli þar sem hægt er að fá veitingar að hætti Jörundar Guðmundssonar, sem er skálavörður.

Það skemmir ekki að vallargjaldið er í lægri kantinum miðað við það sem gengur og gerist hjá stóru klúbbunum á höfuðborgarsvæðinu. Fullt gjald um helgar og eftir klukkan 14 virka daga er 2.000 krónur, en hjónaafsláttur er veittur (3.500 kr.). Ef spilað er fyrir klukkan 14 virka daga er gjaldið 1.500 krónur (hjón 2.500 kr.). Þá er veittur afláttur af vallargjaldi fyrir öldunga, 67 ára og eldri, fyrir klukkan 14 virka daga; 1.000 krónur og það sama greiða unglingar 16 ára og yngri.
Síminn í golfskálanum er: 424-6529.
- vajo

Sjá myndir af Kálfatjarnarvelli.

Mynd/Kylfingur.is: Slegið af áttunda teig á Kálfatjarnarvelli.