Jamie Donaldson sigraði á Opna írska

Enginn vindur, mjúkur völlur og nokkrir bestu kylfingar heims var góð uppskrift fyrir lokadaginn á Opna írska mótinu sem lauk í dag en Jamie Donaldson sigraði í fyrsta sinn á evrópsku mótaröðinni. Þessi 36 ára Walesverji leiddi mótið eftir þrjá hringi á 12 höggum undir pari. Hann gerði sér svo lítið fyrir og lék lokahringinn á Royal Portrush vellinum í dag á 66 höggum eða sex undir pari og endaði 18 undir í heildina. Hann vann mótið með fjögurra högga mun en í öðru sæti komu þeir Anthony Wall, Fabrizio Zanotti og Rafa Cabrera-Bello á samtals 14 höggum undir pari.

Slæmt veður setti svip sinn á mótið en fyrstu þrír hringirnir voru spilaðir í miklum vindi og rigningu. Það kom þó ekki niður á áhuga heimamanna en á hverjum einasta degi fylgdu yfir 25 þúsund manns kylfingum eftir í rigningunni á þessum fallega golfvelli.

Rory McIlroy var með í mótinu en honum tókst ekki að blanda sér í toppbaráttunna af ráði þrátt fyrir að hafa leikið nokkuð gott golf alla helgina. Hann endaði jafn í 10.sæti á 11 höggum undir pari.

Til baka