Verkefnið er stressandi og spennandi

- segir Haraldur Fraklín sem verður í sviðsljósinu á The OPEN á Carnoustie í Skotlandi

„Þetta er einn erfiðasti og flottasti linksvöllur í heimi. Verkefnið er stressandi og spennandi. Ég hef bara jákvæða hluti að segja um þetta. Hef því miður aldrei komist á neitt í líkingu viđ þetta mót og veit ekki við hverju að búast,“ segir Haraldur Franklín Magnús, atvinnukylfingur úr GR og Íslandsmeistari í höggleik 2012. Haraldur lék til úrslita um Íslandsmeistaratitilinn á Hvaleyri í fyrra en tapaði í umspili við Axel Bóasson.

Haraldur náði þeim magnaða árangri að vinna sér þátttökurétt á Opna mótinu þegar hann varð annar í úrtökumóti sem haldið var á Princes vellinum í S-Englandi en hann lék 36 holurnar á -2. Tveir aðrir kylfingar unnu sér þátttökurétt, Englendingurinn Tom Lewis (-3) og tvöfaldur meistari á Opna bandaríska mótinu, S-Afríkukylfingurinn Retief Goosen (-1). Opna mótið fer fram að þessu sinni á Carnoustie vellinum á miðri austurstönd Skotlands. Flestir eru sammála um að völlurinn sé sá erfiðasti á opna „hringnum“.

Eftirminnilegt er þegar Frakkinnn Jean Van DeVelde henti frá sér sigrinum árið 1999. Hann var með þriggja högga forskot fyrir lokaholuna en tókst á ótrúlegan hátt að leika hana á þremur yfir pari, 7 höggum og það með einpútti. Hreint magnað.
Síðast þegar leikið var á Carnoustie, árið 2009, sigraði Írinn Patraig Harrington eftir óvæntan bráðabana við Spánverjann Sergio Garcia.

Haraldur hefur náð ágætum árangri á Nordic Golf mótaröðinni en hefur einnig leikið annars staðar. Hans markmið fyrir úrtökumótið í Englandi var nokkuð skýrt að hans sögn.
„Ég fór á Princes međ markmið að komast í gegn. Annars er til lítils ađ keppa. Spilaði bara nokkuđ stöðugt. Engin rosa „highlights“ og engin stór mistök. Hef gaman að því ađ spila par golf. Og þetta hentaði vel.“

En stemmningin á svona úrtökumótum er sérstök en gefa tækifæri eins og núna þegar Haraldur komst inn á Opna mótið.
„Svona úrtökumót er rosa spurning um sambland af vilja og dagsformi,“ segir kappinn sem hefur með þessum árangri skrifað nýjan kafla í golfsögu Íslands.

Carnoustie golfvöllurinn þykir sá erfiðasti á Opna hringnum.

Senda fréttaskot