Valdís Þóra: Allt á réttri leið

Atvinnukylfingurinn Valdís Þóra Jónsdóttir var um helgina höggi frá því að komast í gegnum niðurskurðinn á ActewAGL Canberra Classic mótinu sem fram fór í Ástralíu á Evrópmumótaröð kvenna.

Um var að ræða annað mót tímabilsins hjá Valdísi en hún endaði í 53. sæti í fyrsta mótinu. Valdís greindi frá því á Facebook síðu sinni eftir mót að leikur hennar væri á réttri leið og að skorið hafi ekki verið jafn gott og spilamennskan.

„Þá er mótinu í Canberra lokið og það var örlítill rússíbani. Góð högg og slæm högg eins og alltaf en ég einfaldlega náði ekki að skora almennilega á fyrsta hringnum.

Seinni hringurinn var betri þó það hefði verið þægilegt að sjá aðeins fleiri fugla falla þar sem tækifærin voru til staðar. Missti köttið með 1 höggi en það er nú stundum svo. Þetta er allt á réttri leið.“

Næsta mót á mótaröðinni fer fram dagana 22.-25. febrúar á Bonville golfvellinum í Ástralíu. Þangað til mun Valdís æfa við bestu aðstæður.

„Ég er komin yfir til Adelaide og mun verja næstu viku hérna. Læt vita af mér fljótlega,“ sagði Valdís að lokum.


Skorkort Valdísar á ActewAGL Canberra Classic.

Ísak Jasonarson
isak@vf.is