Stór dagur í sögu Golfklúbbs Selfoss

Það er ekki hægt annað en að segja að 12. maí hafi verið stór dagur í sögu Golfklúbbs Selfoss. Frá því að klúbburinn var stofnaður árið 1971 hefur gengið erfiðlega að koma föstu landi undir starfsemi klúbbsins og er Svarfhólsvöllur fjórða vallarstæði klúbbsins.

Þann 12. maí skrifaði Sveitafélagið Árborg undir langtímasamning við Golfklúbb Selfoss sem felur í sér að klúbburinn verður með Svarfhólsvöll ásamt nýju svæði undir 18 holur og æfingasvæði til langframa. Skrifað var undir ótímabundinn samning með löngum uppsagnarfresti.

„Við í Golfklúbb Selfoss erum gríðarlega ánægð og stolt að hafa náð þessum gríðarlega góða samningi sem festir klúbbinn í sessi á þessum fallega stað,“ skrifar Hlynur Geir Hjartarson, framkvæmdarstjóri GOS, á heimasíðu klúbbsins. „Núna er hægt að hefja uppbyggingu og ekki þarf að óttast lengur um staðsetningu vallarins.“

Stefnt er að því að hefja uppbyggingu á nýjum holum síðar á þessum ári.

Ísak Jasonarson
isak@vf.is