Ósætti hjá Golfklúbbi Akureyrar | Sturlu sagt upp störfum

Sturla Höskuldsson var í dag rekinn úr starfi sem PGA golfkennari Golfklúbbs Akureyrar. Á heimasíðu Golfklúbbsins kom fram að Sturla hefði sjálfur ákveðið að hætta en samkvæmt Facebook síðu kennarans er það ekki rétt.

„Stjórn Golfklúbbs Akureyrar hefur í dag ákveðið að segja mér upp störfum frá og með deginum í dag,“ sagði Sturla.

„Engar skýringar fylgdu uppsögninni en ég tel víst að það sé fyrir þær sakir að hafa sagt að formaðurinn væri óþolandi að vinna með og að ég vildi að kosinn yrði nýr formaður að komandi aðalfundi.

Aðalfundurinn verður haldinn í byrjun janúar og verður mjög áhugavert að sjá hvað fer fram þar, þegar ný stjórn tekur við. Ég vonast innilega eftir því að geta þá haldið árfam starfi mínu hjá GA, enda kunnum við virkilega vel við okkur hér á Akureyri. Ást og friður sé með yður!“

Sturla tók við sem PGA kennari hjá Golfklúbbi Akureyrar árið 2014 og hafði því starfað hjá klúbbnum í þrjú ár.  Þar áður hafði hann starfað sem golfkennari í Svíþjóð hjá Torreby Golfklubb, hjá Golfklúbbi Kópavogs og Garðabæjar, Golfklúbbnum Oddi og Golfklúbbi Fljótsdalshéraðs. 

Ísak Jasonarson
isak@vf.is