Ólafía Þórunn jöfn í 36. sæti þegar Blue Bay mótið er hálfnað

Ólafía Þórunn Kristinsdóttir, atvinnukylfingur úr GR, lék á 76 höggum á öðrum hring Blue Bay LPGA mótsins. Mótið fer fram á Hainan eyjunni, en eyjan er hluti af Kína. Ólafía er eftir daginn samtals á fjórum höggum yfir pari og er þegar þetta er skrifað jöfn í 36. sæti.

Ólafía lék fyrsta hring mótsins á 72 höggum, eða pari vallar. Hún hóf leik á fyrstu holu í nótt og lék hún mjög vel á fyrri níu holunum. Hún lék þær á tveimur höggum undir pari, þar sem hún fékk fugl á holum fimm, sex og átta og einn skolla á annari holu dagsins.

Síðari níu holurnar reyndust Ólafíu mjög erfiðar og þá sérstaklega fyrstu fjórar holurnar. Þær lék hún á sex höggum yfir pari, tveir tvöfaldir skollar og tveir skollar, og var því komin fjögur högg yfir par. Síðustu fimm holurnar lék hún á pari og því 76 högg staðreynd.

Þegar þetta er skrifað er Shanshan Feng í forystu á sjö höggum undir pari.

Hérna má sjá stöðuna í mótinu.