Nýjasti golfklúbburinn opnar í Holtagörðum

Nýjasti Golfklúbbur landsins opnaði nýlega en þar er boðið upp á fyrsta flokks aðstöðu fyrir kylfinga til leiks og æfinga allan ársins hring. „Markmiðið er að koma upp aðstöðu þar sem kylfingar eiga samanstað í góðu umhverfi, stað þar sem öll fjölskyldan getur komið og leikið hring eða tekið æfingu, stað þar sem golfhópar geta skipulagt sína föstu hringi þegar aðstæður hamla golfleik úti, þar sem kylfingar á öllum getustigum geta fínpússað sveifluna sína með eða án kennara og síðast en ekki síst staður þar sem fólk getur stígið sín fyrstu skref í golfinu,“ segir Viggó Viggósson einn af eigendum Golfklúbbsins en fern hjón eru eigendur staðarins.

Golfklúbburinn er staðsettur í Holtagörðum í Reykjavík, að Holtavegi 10 á efri hæð og er í 850 fermetra húsnæði. Fyrst um sinn verða í fimm golfhermar í rekstri, fljótlega verður bætt við öðrum æfingarbúnaði s.s. púttbrautum. Hægt er að leika golf á 66 völlum hjá Golfklúbbnum, á þeim lista er að finna fjölda þekktra valla beggja vegna Atlanshafsins.
Viggó segir að fimm golfhermar Golfklúbbsins komi frá Full Swing Golf í San Diego. Full Swing hefur framleitt golfherma í 30 ár. Dæmi um aðila sem treysta Full Swing fyrir sínum æfingum eru Jordan Spieth, Jason Day, Jim Furyk, Padraig Harrington og Tiger Woods.

Í Golfklúbbnum er líka veitingastaður sem er innréttaður á hlýlegan og fallegan máta en hann opnar innan skamms. Á staðnum er fjöldi sjónvarpstækja þar sem sýnt verður frá því sem efst er á baugi í íþróttum á hverjum tíma, auðvitað með áherslu á golf og boltann.

„Golfhermarnir eru komnir í fulla virkni og er óhætt að segja að viðbrögð gesta okkar hafa verið sérstaklega góð. Næstu vikurnar bjóðum við kylfingum að koma og prófa á hálfvirði,“ segir Viggó en verðið pr. klst. í golfherma er frá kr. 4.500 til 6.000.
Opið er frá 12:00 til 18:00 fyrir þá sem vilja kíkja í heimsókn. Vilji fólk panta tíma eftir 18:00 þá er bara að hafa samband við Viggó í síma 825 9111 eða senda póst á viggo@golfklubburinn.is.