Nicklaus hefur lítinn áhuga á endurkomu Woods

Golfáhugamenn um allan heim glöddust mikið þegar Tiger Woods snéri til baka á Hero World Challenge í desember. Reyndar ekki allir því sjálfur Jack Nicklaus hefur lítinn áhuga á því að horfa á Tiger.

Tiger spilaði frábærlega á mótinu sínu í Bahamas á dögunum og fékk fólk til þess að trúa því að hann geti komið til baka og keppt um sigur á mótum á nýjan leik.

„Ég hef engan áhuga á þessari endurkomu,“ sagði Nicklaus sem þó fylgdist með Tiger á Bahamas en hann ætlar að láta þar við sitja.

„Vona ég að Tiger gangi vel? Að sjálfsögðu en ég hef bara ekki áhuga á því að horfa á hann. Ég er búinn að horfa á hann spila í rúm 20 ár. Af hverju ætti ég að vilja horfa á meira? Ég horfi ekkert á golf lengur.“

Tiger Woods mun væntanlega snúa aftur á PGA mótaröðina næst um miðjan febrúar.

Ísak Jasonarson
isak@vf.is