Justin Thomas: „Gefið BK bara verðlaunin“

Nú fer PGA tímabilið senn að klárast og verða þá ýmis verðlaun veitt, þar á meðal verðlaun fyrir Kylfing ársins (e. Player of the Year). 

Áður en FedEx úrslitakeppnin hófst lét Tiger Woods hafa eftir sér að það væri bara Brooks Koepka sem kæmi til greina í valinu um Kylfing ársins. Ástæðan er tveir risatitlar Koepka og því varla hægt að mótmæla þeim rökum.

PGA mótaröðin er aftur á móti ekki alveg á þeim buxunum að Koepka sé eini kylfingurinn sem komi til greina en í gær birtu þeir lista af mönnum sem koma til greina. Á listanum eru, ásamt Brooks Koepka, Dustin Johnson, Justin Thomas, Bubba Watson og Bryson DeChambeau.

Justin Thomas sagði sína skoðun í kjölfarið af birtingu þessa lista og sagði einfaldlega: „Gefið BK bara verðlaunin.“

Thomas sagði svo einnig að það væri erfitt að mótmæla því sem Woods sagði þar sem hann hefði nú unnið þessi verðlaun 11 sinnum og vissi alveg hvað þyrfti til.

Senda fréttaskot