Hola í höggi/fréttir | föstudagur 26. september 2008 | 12:01

Tinna fór holu í höggi

Tinna Jóhannsdóttir úr GK, sem stundar nám í  University of San Francisco, náði draumahöggi allra kylfinga á háskólamóti í Bandaríkjunum á þriðjudaginn. Þetta er í fyrsta sinn sem hún fer holu í höggi. Tinna náði draumahögginu á 7. holu  Trysting Tree vallar í Oregon er hún lék í  Giustina Memorial mótinu. Hún notaði 7-járn á þessa 155 jarda holu og kom ásinn á lokahringnum sem hún lék á 75 höggum, eða 3 höggum yfir pari.

Hún lék hringina þrjá á samtals 234 höggum, eða 18 höggum yfir pari (81-78-75) og hafnaði í 19. sæti í einstaklingskeppninni. Skólaliðið hennar, University of San Francisco, USF, hafnaði í þriðja sæti í liðakeppninni. Þetta er annað háskólamótið sem hún tekur þátt í á þessu keppnistímabili. Í síðustu viku varð hún í 27. sæti á móti í Fort Collins.

Tinna stundaði nám í McNeese háskólanum veturinn 2006, en líkaði ekki dvölin og tók sér frí frá námi í fyrra og ákvað að skipta nú um skóla og fór til San Francisco. Tinna er í íslenska landsliðinu sem fer á HM í Ástralíu í næsta mánuði.

Sjá  heimasíðu skólans.

Mynd: Hér fagnar Tinna Jóhannsdóttir draumahögginu.