Birgir Leifur meðal keppenda í nýju móti á Evrópumótaröðinni

Um helgina fer fram Belgian Knockout mótið á Evrópumótaröð karla en um er að ræða nýtt mót á mótaröðinni og fyrsta mótið sem fer fram í Belgíu frá árinu 2000. Ryder stjarnan Thomas Pieters stendur á bak við mótið en hann er einmitt frá Belgíu.

Atvinnukylfingurinn Birgir Leifur Hafþórsson verður meðal keppenda í mótinu en leikfyrirkomulag þess er með óvenjulegum hætti.

Alls taka 144 kylfingar þátt í mótinu sem hefst á fimmtudaginn og lýkur á sunnudaginn. Eftir tvo hringi, þar sem leikinn er höggleikur, komast 64 kylfingar áfram. Í 64-, 32- og 16- manna úrslitum eru svo leiknar 9 holur og komast þeir kylfingar áfram sem leika á lægsta skorinu hverju sinni.

Á sunnudeginum fara svo 8-manna úrslitin, undanúrslitin og úrslitaleikurinn fram og verða þá aftur 9 holur leiknar hverju sinni. Fari svo að leikirnir endi jafnir að níu holum loknum verður farið í bráðabana.

Ísak Jasonarson
isak@vf.is