Forsíða | laugardagur 10. janúar 2009 | 17:03

„Ryder“ keppni á Íslandi

"Ég var ekkert of uppveðraður þegar ég sá fyrst tillögu um „Ryder“ keppni á Íslandi í leiðara Golfs á Íslandi nú fyrir jólin. Keppnin er svo komin á mjög svo breytta mótaskrá GSÍ fyrir næsta ár.  Reglugerðin virðist svo vera skrifuð á spjallinu hér á Kylfingi. Mest er deilt um hvort það eigi að vera blönduð lið karla og kvenna," segir Margeir Vilhjálmsson í nýjasta pistli sínum.

"Ef saga hinnar eiginlegu Ryder Cup keppni er skoðuð varð hún til vegna áhuga manna á að koma upp liðakeppni  milli breskra og bandarískra atvinnumanna í golfi. Meðgangan tók nokkur ár. Fyrst voru leiknar nokkrar óformlegar keppnir  sú fyrsta á Gleneagles árið 1921 í Skotlandi en sú fyrsta formlega árið 1927 í Massachusettes í Bandaríkjunum. Óformlegu keppnirnar voru haldnar á undan öðrum mótum atvinnumanna á þeim tíma. Keppnin hefur þróast í gegnum árin og hefur átt sinn þátt í auknum vinsældum golfíþróttarinnar. Keppnin er nú um 80 árum síðar einn stærsti íþróttaviðburður sem haldinn er í heiminum. Í gegnum tíðina hafa svo myndast afsprengi eins og Solheim Cup og Presidents Cup.

Vísa á pistil minn um Íslandsmótið í golfi og vöntun á því að áhorfendur séu dregnir þangað í síðasta tölublaði Golfs á Íslandi. Ég sé ekki að áhorfendur komi til með að mæta á „Ryder“  keppni á Íslandi þegar mjög fáir sækja nú þegar bæði Íslandmót og Sveitakeppni GSÍ. Til að byggja upp slíka keppni mætti skoða sambærilega leið og notuð var þegar fyrsta óformlega Ryder keppnin var leikin í Skotlandi t.d. með því að halda mótið á undan Íslandsmótinu í golfi eða jafnvel á einhvern máta tengja það Íslandsmótinu í holukeppni. Nái keppnin vinsældum mun hún standa undir sér sjálf sem góður viðburður á íslenska golfdagatalinu.

Það eru til ótal leiðir til að velja í lið og hverjir eiga að mynda lið saman. Möguleikarnir á því að blanda saman körlum, konum, unglingum, öldungum eru einnig fjölmargir.  Það er engin ástæða til þess að binda fjölda leikmanna í hvoru liði við sömu reglur og eru í hinni eiginlegu Ryder Cup. Hér mættu  alveg eins vera 32 í hvoru liði, 8 karlar, 8 konur, 8 öldungar, 8 unglingar.  Þegar svona keppni er sett saman þarf að hugsa út fyrir rammann og setja saman formúlu sem virkar.

Eftir stendur tilgangurinn. Til hvers er verið að keppa? Um hvað er verið að keppa? Næst einhvern tímann stemmning í lið sem er blandað GR ingum og Keilismönnum?  Ef það á að gera svona mót vel úr garði þá kostar það peninga og þó nokkuð af þeim. Það mun t.d. vanta mikið uppá stemmninguna ef liðin eru ekki í búningum. Golfbúningur á mann kostar ekki undir 10.000 krónum. Hver er tilbúinn að leggja til völl? Hvað sem hver tautar og raular þá er það ekki ókeypis. Ekki býst ég við að leikmenn ætli að greiða þátttökugjald? Eiga klúbbarnir kannski að greiða það fyrir þá og fá svo á sig kvartanir fyrir peningaaustur í afreksmál? Hvar og hvernig á að fá tekjur til að standa undir kostnaði? Gott er að hafa svör við svona leiðinda spurningum, líka áður en lagt er af stað.

Gleymum því ekki að Ryder keppnin skilar stjarnfræðilegum hagnaði til samtaka atvinnukylfinga og því lykilatriði fyrir þau að keppnin sé vel heppnuð."

Með golfkveðju,
Margeir Vilhjálmsson

Sjá fleiri pisla Margeirs.