19. holan | þriðjudagur 19. ágúst 2008 | 23:14

Sigríður Anna sló draumahöggið í Kína

Sigríður Anna Guðjónsdóttir úr GO, móðir Ragnheiðar Ragnarsdóttur sundkonu sem keppti á Ólympíuleikunum, skellti sér í golf suður af Peking í dag.  Hún gerði sér lítið fyrir og fór holu í höggi á 12. holu vallarins.  Hún notaði 7 járn (Callaway Lady Big Bertha), en holan er 130 yarda af rauðum teig, par-3. 

Höggið var einkar glæsilegt, þráðbeint og lenti á flötinni fyrir framan flaggið og rann boltinn beint á stöngina og ofaní.  Mikið tilstand var í klúbbhúsinu á eftir hringinn, en Kínverjar taka þessu með mikilli alvöru og gleði.  Sigríður Anna var leyst út með gjöfum og fer á heimasíðu klúbbsins, sem "Hole-in-One member".

Með Sigríði Önnu í holli voru eiginmaðurinn Ragnar Marteinsson úr GO og Gauti Grétarsson sjúkraþjálfari úr NK, ásamt þremur kínverskum kadddí-stúlkum/kylfumeyjum sem ærðust af gleði yfir þessu. 

Meðfylgjandi er mynd af Sigríði með boltann góða og síðan við hlið kylfumeyjar sinnar.